Disono y

Disono tusonika diaka i disono y. Ye vava si umona kieleka mu nki tutulanga ditona va masono i meto ye va masono j meto: kadi kana watula matona va zulu kwa disono y, mu ntangu yina kaka dio dikituka ij. Kimangu kaka!

Disono diadi disonikwanga bobo. Mata malembe, kuluka ngolo, bosi vanga nsinga fioti ya nswalu vana vau usimbidi nsi, ye landila mata mu nzila ya kusungama, bosi kuluka mu nzila ya kusungama ye sonika disono j. Bosi zungisa nsinga, ye vanga nsinga fioti ya nswalu mu nzila ya kusungama, yikubama mu disono dilanda.

Disono j dia mpila ya masono, dina mu disono y vava, dina ye nsinga yizungazunganga mu nsinga yandi ya kumata malembe. Yifweti kala ya kusungama. Ye bonso mvovele, disono j difweti kala dia nda kuluta dina vava. Diau sonika dio dia nda, kadi dimonikanga kitoko kuluta kana dia nda. Ye meso maku si makuzayisa ntangu ntela yina wamona ya kitoko. Kana dia nda beni, dilenda monika dia kuseva fioti, kansi nanga si uzola dio. Kansi dia nkufi beni ka dimonikanga kitoko ko.

Diau tusonika disono y. Sonika ndonga ya masono y, ye vanga bobo mu lukaya lwawonso nate wasonika mo mbote. Tala mbote vo mintu mia masono y mina ye ntela yimosi. Disono dia ntete ye disono dia zole: mintu miau miole mifweti kala ye ntela yimosi.

Diambu dimosi dibwanga mbala mingi: bu usonikanga, kima kilanda usonika kikalanga kia nkufi kuluta kima wayantikila. Diambu diadi dibwilanga bantu bangi balongokanga kusonika. Mono ndongele minlongoki mingi, mingi kibeni mu kusonika, ye mbwene vo diambu diadi dibwanga mbala ye mbala. Diau ndikukebisa dio buabu, kimana wakeba.

Mu mbandu yayi ya nkanda wa nkulu, nkanda muntu wasonikina nkwandi, ulenda mona masono y matatu, ye ulenda mona vo masono mama ma nda kuluta masono y mena mu mbandu ina va ntwala eto. Ulenda mona mpe vo dimosi dia mo, dina ku zulu ku lubakala, dikulukidi kieleka ku nsi, ye dikotele mu ndonga ya masono yina ku nsi. Ka diambu ko, dina mbote kibeni. Ye diau i mbandu ya mbote ya disono y, mingi-mingi disono dia ntete dina ku zulu. Kifwanu kiandi kia kitoko. Tala dio mbote, ye si umona mpila nsoniku yayi yisalanga.

Nkanda wa kukilonga 13